Roa andro talohan’io no nahazo loharanom-baovao momba ity fisolokiana ity ny teo anivon’ny zandary. Natao ny vela-pandrika, ka nihaona nivantana tamin’ilay ramatoa iray tamin’ireo mpiray tsikombakomba ny kaomandin’ny tobim-paritry ny zandarimaria Antsirabe. Nambaran’ity vehivavy ity tamin’izany fa misy  mpiasan'ny Banky foibe avy eto Antananarivo afaka mamoaka ravin-taratasy fanamboarana vola.  Misy akora ampiarahina amin'io taratasy io avy eo ka rehefa sasana miaraka ireo dia vola iray alina na roa alina Ariary no mivoaka ary vola tena izy fa tsy sandoka. Raikitra ny fifanarahana fa hatao ny andrana ka vola folo tapitrisa Ariary no sandan’ny ravin-taratasim-bola sy ny akora mahavita vola mitentina telopolo tapitrisa Ariary avy amin’izy ireo. Ny 18 jolay teo no fotoana nifanomezan’ny roa tonta fa hanaovana ny fifanakalozana sy ny andrana.

Roa lahy sy ramatoa iray nitondra ravin-taratasy voadidy toy ny vola iray alina Ariary voafono tao anaty « papier alu » sy ilay akora hafa voalaza fa ilaina amin’ny famokarana vola taratasy no namonjy ny fotoana tamin’ny CB, tamin’io andro io. Ity farany izay nasain’izy ireo nitondra vovon-tsavony sy fitaovana fanindronana.  Mody natao ny fanandramana ireo ravin-taratasy ka dia vola taratasy efatra amin’ny iray alina Ariary no navoaka avy ao. Nantsoina ireo zandary efa niandry tsy lavitra ny hotely nifamotoanan’izy ireo ka noraisim-potsiny izy telo mianadahy ireto.

Manoloana ny tranga tahaka izao, tsara hatrany ny manamarina ny vola taratasy mialoha ny handraisana azy. Hamafisina ihany koa fa tsy misy olon-tsotra na mpiasan’ny Banky foibe mahavita lelavola malagasy.

N.A